Коронавирусқа қарсы күрес: Қытай тәжірибесі

19 наурыз, 17:31

Фото: nege.kz

COVID-19 індетінің ошағына айналған Қытайдың Хубэй провинциясы мен ондағы Ухань қаласында соңғы тәуліктерде коронавирус жұқтырған бірде бір жаңа науқас тіркелмеген. Бұл туралы ҚХР денсаулық сақтау жөніндегі Ұлттық комиссиясы хабарлады. Бұл – қаңтар айының аяғында осы өңір карантинге жабылған  уақыттан бергі алғашқы жағымды жаңалық. 

Хубэй провинциясындағы ауруханалардан 795 адам жазылып шыққан. Сегіз адамның қайтыс болғаны туралы хабарланды. Індетті әлі түбегейлі жеңбегенімен, Қытай оның бетін қайтара алды деуге әбден болады. Сондықтан коронавирусқа қарсы күрестегі Қытайдың тәжірибесі бізге аса пайдалы болар деп ойлаймын.   

Жылдам әрекет

Қытай билігі о баста табиғаты белгісіз бұл індеттің қаншалықты тез тарайтынын болжай алмады. Сол себепті індет ошағына айналған Ухань қаласындағы жағдай туралы ақпарат таратуға тыйым салды. Тіпті былтыр желтоқсан айының соңында жаңа белгісіз ауру туралы достарына айтқан жергілікті дәрігерді қылмыстық жауапқа да тартып, кейін одан кешірім сұрауға мәжбүр болды. Ухань қаласын оқшаулау туралы шешім шыққан соң да бірнеше сағат бойы қала ашық тұрды. Нәтижесінде 11 миллион халқы бар қаланың 5 миллионға жуық тұрғыны буынып-түйініп қаладан қашып үлгерген. Соның нәтижесінде ауру Қытайдың өзге өңіріне де тарап кетті. Мұны кеш те болса түсінген Қытай билігі қала басшысын орнынан алып, қылмыстық жауапқа тартты. Осыдан кейін кідіруді кешірмейтін кез келген шешімнің жылдам қабылданып, оның тез орындалуы қатаң бақылауға алынды. Қытайдағы індеттің пайда болу себебі мен тарау жолдарын зерттеген ДДСҰ төрағасының кеңесшісі доктор Брюс Эйлворд әлем елдері осы мәселеде дұрыс сабақ алмады деп санайды.

«Қытайда мәселенің түйіні жылдамдықта екенін анықтадық. Бұл ауруды кем дегенде бақылауда ұстаудың тиімді жолы ауру жұқтырғандарды тез анықтау, оларды оқшаулау және олармен қарым-қатынаста болғандарды да жылдам анықтап, оқшаулау. Халық мұның қаншалықты екенін түйсіне білуі керек және билікпен бірге барлық қажетті шараны орындауға көшуге міндетті. Міне Қытайда осы мәселе өте жылдам іске асырылып отырды», – дейді Брюс Эйлворд BBC арнасына берген сұхбатында.

Қытай елінің  жылдам қимылдай алатынының айқын көрінісі – Уханьдағы мың адамға арналған жаңа аурухана. Бұл мекеме бар-жоғы 10 күн ішінде салынып пайдалануға берілгеніне әлем елдері таңдай қақты.

Қатаң тәртіпке бағыну

Қытай билігі әскер мен полицияның көмегімен ауру өршіп кеткен қаланы қойып, бүтін өңірлерді оқшаулап тастады. Карантин аумағынан шығып кету, тыйым салынған мерзімде көшеде бетпердесіз жүруге мейлінше шек қойылды. Медициналық бетперде тапшылығы басталғанда, қорғаныш құралдары өндірісі жедел жолға қойылды. Медициналық бетперде сатуды заңсыз бизнеске айналдырғандарды, қызмет бабын пайдаланып, індет кезінде қажет материалдық құндылықтар мен қазынаның қаржысын талан-таражға салғандарды бірден өлім жазасына кесті. Тіпті коронавирус жұқтырғаны анықталса да емнен, оқшаулаудан бас тартқан, карантин тәртібін бұзған науқастарға да ең ауыр жаза белгіленді.

Індет өршіп тұрған кезде барлық азаматқа зарарсыздандыру қамына тегін бір литр спирт үлестірілген. Қытай азаматтарының айтуынша, мұндай спирт кемінде 2-3 айға еркін жеткен көрінеді. Барлық қоғамдық орындар зарарсыздандырылып, көпқабатты үйлердегі лифттерге арнайы спиртті сулықтар қойылған. Қатаң карантиндегі тұрғын үйлердің тұрғындары азық-түлік, басқа да қажетті заттарын тек белгіленген уақытта, бекітілген тәртіппен алуға көшті.   

Оқшауланған қала тұрғындарына біздегі пәтер иелері кооперативі секілді ұйымдар арқылы тегін бетперде, қолғап секілді қарапайым қорғаныш құралдары үлестіріліп отырған. Бітіп қалған жағдайда жаңағы мекемелерге тапсырыс беру арқылы, қажет мөлшерде алып тұрған. Барлық азаматқа Қытайдағы арнайы чат арқылы онлайн түрде ақпарат беріліп тұрады. Тиісті нұсқаулықтың бәрін ұлттық денсаулық сақтау комиссиясы әзірлеп және сол құзырлы орган ғана таратумен айналысты.

Азаматтық жауапкершілік

Қытайлардың өздері мемлекеттік орындардың қолға алған шаралары азаматтардың жаппай жауапкершілігінің көмегімен ғана толық жүзеге асқанын айтады. Қытай қалаларындағы көпқабатты үй тұрғындарынан құрылған еріктілер бригадалары өздеріне тиесілі ауланы, үйдің кіреберістерін зарарсыздандырды, қоғамдық тәртіпті күзетуге көшті. Барлық қажетті құралды мемлекет тегін беріп отырды.

Еріктілер үйге кіріп-шыққандардың тізімін жасап отырды, күн сайын пәтерлерді аралап, тұрғындардың дене қызуын өлшеп, ауырғандар туралы дәрігерлерге хабарлап тұрды.

Тіпті азық-түлік тасымалдау, қоқыс төгуді де еріктілер өз мойнына алған. Ал көптеген пәтер иелері карантин кезінде баспанасын жалдап тұрғандардан  ақы алудан бас тартыпты. Қытай басылымдарында уақытша ауруханаларды салған құрылысшылардың көпшілігі өз еркімен тегін жұмыс істегені туралы жазды. Жағдайы бар адамдар дәрігерлер қорына, вирусқа қарсы күрес қорына көмек ретінде қаржы аударып келген.

Еріктілер қызуды түсіретін дәрі мен бетпердені саудалаған адамдарды анықтаған жағдайда бірден полицияға хабарлаған. Сонымен бірге өз үйлері мен ауласында қылмыс болмағанын қатаң қадағалапты.

Қытайдың қателігін қаталамайық!

Қытай билігі індет басталған кезде оны жасырып-жабуға тырысты. Бұл – тоталитарлы жүйеге тән құбылыс. Ақпараттың аздығынан, қорғаныштың нашарлығынан жүздеген дәрігер ауру жұқтырып, кемінде 46 маман көз жұмған. Вирустың тез тарауының тағы бір себебі – тарау жолдарының көптігінде көрінеді. Қытай дәрігерлері оның көз арқылы да жұғатынын ескертуде. Мәселен бұл елде ауру жұқтырған дәрігерлердің басым бөлігі көз ауруларын емдейтін отоларингологтар екені де мұны қуаттай түседі. Айтпақшы, бұл ауру туралы алғаш хабарлаған Ли Веньлян есімді дәрігер де офтальмолог еді. Ол кейін осы вирустан көз жұмды.    

Қытай дәрігерлері сонымен бірге мүмкіндігінше көп тест жасауға, одан қаржы аямауға шақырады. Коронавирусты анықтаудың және оны ауыздықтаудың жалғыз амалы осы дейді олар.

ҰҚСАС ЖАЗБАЛАР
Яндекс рекомендации