Біртановтың «Б» жоспарының «құпиясы» ашылды

06 наурыз, 12:04

Фото: Ғалым Смағұлұлы

Естеріңізде болса, жуырда Денсаулық сақтау министрі Елжан Біртанов коронавирусқа қатысты «Б» жоспарымыз бар деген. Nege.kz порталы Біртановтың әлгі «Б» жоспарының «құпиясын» ашты.

Nege.kz порталында «Алматыдағы ауруханада «жүздеген қытай» НЕГЕ жатыр?» деген мақала жарияланып, Денсаулық сақтау министрлігі ғана емес, дүйім жұрт дүрліккен. Мақалада Алматыдағы фтизопульмонология орталығында Қытайдың жүзден астам азаматы емделіп жатқаны айтылды. Іле-шала қалалық әкімдікте шұғыл жиын өтіп, Денсаулық сақтау басқармасының басшысы Тілеухан Әбілдаев Қытайдың 112 азаматы карантинде жатқанын мойындады. Басқарма басшысы вирус анықталмағандары ауруханадан шығарылып жатқанымен, шетелден тағы азаматтар келіп жатқанын да айтты.

Тілшіміз кеше Тілеухан Шілдебайұлына хабарласқан. Оңтүстік Кореядан тағы жүз шақты адамның келгенін білдік. Ұшақтың аман-есен қонғанын кеше Орталық коммуникациялар қызметінде баспасөз мәслихатын өткізген Елжан Біртановтың өзі айтты. Олардың қай елдің азаматы, нақты саны, корановирус жұқтырғандары бар ма, жоқ па, белгісіз.

Журналистің сұрағына байланысты Біртанов өзінің «Б» жоспарын кеше тағы түсіндірді. Яғни елде коронавирус жұқтырған адам анықталған жағдайда, қазіргі атқарылып жатқан шаралар түбегейлі өзгертіліп, «Б» жоспары іске қосылмақ.

Бетін әрі қылсын, әзірге біздің елде вирус жұқтырған адам анықталмады. Анығында, ресми ақпарат солай дейді. Дәріханаларда маска жоқ. Күніне шетелден жүздеген адам ұшып келіп жатыр. Олардың арасында Қазақстанда жұмыс істейтін шетел азаматтары, өз азаматтарымыз және транзитпен қайта ұшып кететіндер бар. «Бұлардың арасында коронавирус жұқтырғандар жоқ» деп ешкім кесіп айта алмайды. Тіпті министрдің өзі де.

Бір қызығы, коронавирустан қашқандардың бәрі біздің елді паналағысы келетін сияқты. Ақпанның соңынан бастап Қытай азаматтары келе бастаса, наурыздың басынан Оңтүстік Кореядан «қонақтарды» қарсы алып жатырмыз. Әуе жолдарын мүлдем тоқтатып тастамаса да, коронавирус көп тарап жатқан елдермен барыс-келісті үзе тұруға болатын еді. Мәселен, Оңтүстік Кореяда жағдай қиын. Коронавирус өршіп тұр. Ал Қазақстанға кеше осы елден жүзден аса жолаушы келді. Рейстер тоқтайтын 8 наурызға дейін қауіпті елдерден тағы қанша адам келетіні белгісіз. Барыс-келіс әзірге тоқтамағанына қарағанда, Біртановтың «Б» жоспарының «құпиясы» осы ма дейміз. Коронавирусты таппай тоқтайтын түрі жоқ, әйтеуір.

Қазақстан – кең байтақ. Қонақжайлығымыз бен кеңқолтықтығымыз тағы бар. Жүз елу қытай, жүз кәріс деген не, тәйірі?! Коронавирустан үріккен бүкіл әлем жұртын құшағымызға қыса аламыз...

Міне, Біртановтың «Б» жоспарының «құпиясы» осы ма деген күдігіміз күннен-күнге қоюланып барады.     

ҰҚСАС ЖАЗБАЛАР
Яндекс рекомендации