Наурыздан бастап есек союға тыйым салынды

26 ақпан, 12:54

Фото: agrostory.com

Есек сойып, еті мен терісін тұтыну жалғаса беретін болса, есек саны тым азайып кетуі мүмкін. Ондай жағдайда, әйелдер есекке айналады.

Алматы, NEGE. Кенияның ауыл шаруашылық министрі Питер Муню 2020 жылдың наурыз айынан бастап есек союға тыйым салынатынын айтқан. Бұл туралы BBC агенттігіне сілтеме жасап iz.ru хабарлады.

«Есектің еңбегінен келетін табыс, оны сойып, етін жеу арқылы алатын барлық пайдадан әлдеқайда көп», - депті Питер Муню.

Себебі 24 ақпан күні Найроби қаласындағы Ауыл шаруашылығы министрлігі ғимаратының алдында есек соятын цехтарды жабуды талап етіп, халық жиналған. Шерушілер ұстаған плакаттардың арасында: «Есек азайған кезде әйелдер есекке айналады» деген жазулар да болған.

Кения тұрғындары көбінесе есекті отын-су тасу үшін пайдаланады. Арбаға шегеді, соқа сүйретеді. Егер осы хайуанның саны азайып кететін болса, әйелдерге түсетін жүктеменің салмағы артып кетуі мүмкін екен.

Дегенмен Ауыл шаруашылығы министрі есек союға лицензиясы бар қасапханалардың жұмысын бірден тоқтату қиын екенін мәлімдеген. Өйткені қасапханаларға басқа жануарларды сойып үйренетіндей уақыт беру керек. «Бұған шамамен бір ай кетеді. Яғни, наурыздан бастап, жаппай есек сою тоқтайды» деген министр.

Бұл елде есекті қынадай қыру 2012 жылдан басталды. Осы жылы есектің еті мен терісіне Қытайдан тапсырыс түскен екен. Естеріңізде болса, осыған ұқсас жағдай көрші Қырғызстанда да тіркелген еді. 2015 жылы Қырғызстанның Шу облысында 600 есек сойған «Қайтал» компаниясына қатысты шу шыққан. Осыған байланысты Қырғызстандағы мемлекеттік ветеринарлық департамент пен санитарлық-эпидемиологиялық қызмет бірлесіп, есектерді жаппай сою ісіне қатысты комиссия құрған болатын. Кейін есек еті мен терісінің Қытайға экспортталу үшін әзірленгені белгілі болған.

ҰҚСАС ЖАЗБАЛАР
Яндекс рекомендации