Жұмыста жоқ медбике мен психологқа айлық төленіп келген

17 қаңтар, 12:56

Фото: inform.kz

Жамбыл облысы Тараз қаласында басқа жақта жұмыс жасаса да, мектептен айлық алып отырғандар анықталды, деп хабарлайды ҚазАқпарат.

Алматы, NEGE. Сыбайлас жемқорлыққа қарсы іс-қимыл агенттігінің Жамбыл облысы бойынша департаменті «Жамбыл – адалдық алаңы» жобалық кеңсесімен бірлесе орта білім беру мекемелерінде сыбайлас жемқорлыққа қарсы мониторинг жүргізді. Жүргізілген мониторинг жұмыстары Тараздағы № 34 мектепте мүдделер қақтығысы орын алғандығын көрсетті. «2018 жылдың 2 тамызында № 163 Еңбек шартына сәйкес № 34 мектеп директоры Нуралиева Динара Хатамқызы «электрик» қызметіне Маметов Руслан Тахировичті жұмысқа қабылдаған. Сол уақыттан бері Р. Маметов бюджет қаражаты есебінен айма-ай электрик қызметінің жалақысын алып келеді (бір айлық еңбекақы 56 258 теңге). Алайда мониторинг жұмыстары Р. Маметов № 34 мектептен бөлек өнеркәсіптік ауқымда күн және жел электр станцияларын жөндеумен, техникалық қызмет көрсетумен және пайдаланумен айналысатын «ECAP Services Kazakhstan» компаниясында 2015 жылдан бері «вахталық» әдіспен жұмыс жасайтыны анықталды», - делінген Жамбыл облыстық Сыбайлас жемқорлыққа қарсы іс-қимыл департаментінің хабарламасында. Осылайша, Р. Маметов әр ай сайын 15 күнге Жуалы ауданына «вахталық» жұмыс істеуге кетіп отырған. Айталық, өткен жылдың қараша айының 15-і мен 30-ы аралығында Р. Маметов Жуалы ауданында жұмыста болған. Жұмыс уақыты 9:00-ден 20:00-ге дейін. Дегенмен, № 34 мектептің есеп бөлімінен алынған қызметкердің уақытты есептеу табеліне сәйкес Р.Маметов сол қараша айының 15-і мен 30-ы аралығында 7 сағаттық толық жұмыс жасады деп көрсетілген. Дәл осындай жағдай барлық айда қайталанып келген. Сондай-ақ, мониторингілік топ аталған мектепте жұмыс жасайтын тағы екі қызметкердің жұмыс графигіне күмән келтірген. Олар – медбике Л. Мухазова және психолог Д. Камалова. «Жүргізілген мониторинг Л. Мухазова Тараз қалалық № 6 емханада жұмыс жасайтындығын, ал Д. Камалова Жошыбаев атындағы кардиохирургия және трансплантология ғылыми-клиникалық орталығында жұмыс жасайтындығын көрсетті. Осыған орай Жамбыл облысы әкімдігінің білім басқармасына анықтамада көрсетілген барлық фактілер бойынша тиісті зерделеу жұмыстарын жүргізіп, жауапты қызметкерлерге шара қолдануды ұсынамыз», -дейді «Жамбыл – адалдық алаңы» жобалық кеңсесінің жетекшісі Назима Жұбандықова.

ҰҚСАС ЖАЗБАЛАР
Яндекс рекомендации