Алматыны дамыту шарасы жалғасады

19 ақпан, 11:15

Фото: Сәрсенбек Қызайбек

Алматы қаласының әкімі Бақытжан Сағынтаевтың мегаполис тұрғындарымен есептік кездесуінде қаланы одан әрі дамытуды қамтамасыз ету мақсатында ұзақ және орта мерзімді шаралар әзірленгенін мәлімдеді.

Алматы, NEGE. Атап айтқанда, халықтың өмір сүру сапасын арттыруға және экономиканың өсуіне бағытталған төрт маңызды құжат дайындалған.  Олар. «Алматы-2050» Даму стратегиясы, «Жаңа Алматы» атты шеткі аймақты дамытудың кешенді жоспары, Алматы агломерациясын дамыту бойынша «Үлкен Алматы» жоспары, «Алматының ерекше мәртебесі туралы» Заң.

«Алматы-2050» Даму стратегиясы – бұл қала болашағының көрінісі. Стратегия шаһарды дамытудың түбегейлі жаңа кезеңін ашып, үш қағидаға негізделеді: жаңа экономика, жаңа кеңістік және жаңа коммуникациялар. Ал 2050 Стратегиясы 7 негізгі бағытты қамтиды: Шетсіз қала, Ақылды қала, Тең мүмкіндіктер қаласы, Қауіпсіз қала, Жасыл қала, Жаһандық іскерлік орталық, Мәдени әрі креативті қала. 

Осының ішінде «Шетсіз қала» қағидасы ерекше маңызға ие. Бұл –аудандарды дамытуда тепе-теңдікті сақтауға, қаланың барлық тұрғындарының өмір сүру сапасын арттыруға мүмкіндік береді.

2020-2024 жылдарға арналған «Жаңа Алматы» жоспарына келсек, соңғы 10 жылда қаланың аумағы екі есе өсті. «Бұл ретте жаңа аудандарды инфрақұрылыммен қамтамасыз ету қажеттілігі күрт өсті. Жоспар бойынша 2030 жылға қарай алматылықтардың саны 3 млн адамға жету мүмкіндігі көрсетілген. Осыған байланысты қала әкімдігі мегаполисті дамытудың бесжылдық кезеңге арналған кешенді жоспарын әзірледі. Үкімет оны бекітті. Басты мақсат – әлеуметтік мәселелерді шешу және халықтың өмір сүру сапасын жақсарту. Бұған инженерлік желілердің тозуын төмендету, орталықтандырылған сумен жабдықтауды және жарықтандыруды 100%-ға жеткізу, жолдардың сапасын және т.б. жақсарту міндеттері кіреді», – деді қала әкімі. 

Сондай-ақ, қала әкімі Алматы агломерациясының жоспары ішкі көші-қон мәселелерін шешетінін айтты. «Жоспарға сәйкес, үлкен Алматыны дамытуда көлік инфрақұрылымы мәселесіне ерекше көңіл бөлінбек. Осы жоспарды іске асыру мақсатында ҮАААЖ айналма жолына 6 көше, қала аумағында 3 көлік торабының құрылысы, облыстың 5 елдімекенінде автовокзал салу жоспарлануда. Орта мерзімді жоспарларда – Ұзынағаш, Қаскелең, Талғар және Есік елді-мекендеріне дейін батыс және шығыс бағытта қала маңындағы электр энергиясының қозғалысын ұйымдастыру», – деді Сағынтаев.

Азық-түлік белдеуін ұйымдастыру мақсатында қала айналасында 4 көтерме-тарату орталығы, 2 ет комбинаты, 7 жылыжай, 2 сүт фермасы салынатын болады. Алматы агломерациясы жаңа жоспарының арқасында қала маңы көпсалалы аймақтар ретінде дамиды деп күтілуде.
«Алматы қаласының ерекше мәртебесі туралы» заң 28 мәселе бойынша әкімдіктің құзыретін кеңейтуде. Заңнамалық өзгерістер әкімдікке қалалық ортаны, жер активтерін, көлік және басқа да қалалық қызметтердің жұмысын, әлеуметтік, сондай-ақ қала құрылысы мен сәулет сұрақтарын басқару бойынша кең ауқымды мәселелерді шешуге мүмкіндік береді.

ҰҚСАС ЖАЗБАЛАР
Яндекс рекомендации